Kolumbiyada futzal üzrə dünya çempionatının final mərhələsi keçirilir. Mundialda ilk dəfə Azərbaycan milli komandası da iştirak edir. F qrupunda mübarizə aparan futzalçılarımız 1-ci turda Afrika çempionu Mərakeş komandası ilə qarşılaşıb.
Oyun komandamızın üstünlüyü şəraitində keçib və bu, fasiləyə 5 dəqiqə qalmış bəhrəsini verib – 15-ci dəqiqədə Vassura hesabı açıb. Az sonra o, dubl edib.
İkinci hissədə də üstünlüyünü davam etdirən millimiz 29-cu dəqiqədə Qallo, 31-də isə Tyaqo Bolina ilə fərqi 4 topa yüksəldib. Matçda son nöqtəni final fitinə 7 dəqiqə qalmış het-trikini rəsmiləşdirən Vassura qoyub. Beləliklə, Azərbaycan millisi futzal üzrə dünya çempionatının final mərhələsinə Afrika çempionu Mərakeş komandası üzərində 5:0 hesablı qalibiyyətlə başlayıb.
F qrupunun digər görüşündə isə İran və İspaniya futzalçıları üz-üzə gəliblər. Qarşılaşma Avropa təmsilçisinin qələbəsi ilə yekunlaşıb – 5-1.
İlk turdan sonra yarış cədvəlində vəziyyət belədir:
- Azərbaycan-3 xal
- İspaniya-3 xal
- İran-0 xal
- Mərakeş-0 xal